Diz la lleenda, que la Piedra de Filadoira tresportóla una vieya filandera na cabeza, ensin parar de filar, per tola sierra dende San Roque hasta la Sierra de Enterríos, pa colocala como cubierta d'un dolmen.
Alloñándonos de lleendes, la más antigua buelga del pasu del home per estes tierres altes de la cuenca del Navia foron les correspondientes a les primeres comunidaes venceyaes a una economía de producción. Amestaos a una actividá ganadera y a una incipiente esplotación agrícola del territoriu, nun arrenuncien a la tradicional actividá de caza y agricultura. Estos grupos foron los constructores de les primeres arquiteutures monumentales que conocemos: dólmenes, círculos líticos y estructures tumulares diverses. Son éstes construcciones megalítiques de calter funerariu non exentes de ciertu conteníu territorial.
La necrópolis d'Enterríos ta compuesta por cinco túmulos, siendo ún de los mesmos conocíu como Dolmen d'Enterríos. Presenta una cámara de planta poligonal de la que desapaecieron los ortostatos que zarraben el llau norte. Nel este abriríase la entrada al traviés d'un corredor, sólamente empecipiáu, compuestu por dos bloques dispuestos de forma paralela y con una cámara amplia zarrada na so parte superior por un gran bloque de cubrición.
