p> La Colexata de Cuadonga ta allugada nuna plaza de la redolada de la Basílica de Cuadonga. La Colexata de San Fernando ocupa'l llau izquierdu de la mesma, mentes que'l frente y el llau derechu son construcciones contemporanees.
La Colexata de San Fernando tien orixe nel sieglu XVII, anque sufrió remodelaciones. Estructúrase en planta rectangular, estremada en dos pisos, alredor a un patiu interior. Tien una torre nún de los estremos y una capiella ocupa'l llau próximu a la cueva.
Los materiales utilizaos son mampostería pa los murios y sillería nes esquines, llínees d'imposta, resalte de vanos, etc. La cubierta ye a dos agües nel cuerpu central y cinco pa la torre.
Na fachada principal ábrese una puerta d'arcu rectu moldiáu, y flanquiada por dos pegollos de piedra que s'enllarguen hasta la parte superior del edificiu. Enriba de la puerta ábrese un balcón que se corona por un frontón con escudu.
Dende la puerta llégase al patiu interior. La planta baxa del claustru ye d'arquería de mediu puntu sobre pegollu de seición cuadrada. El pisu superior suxétase con pies derechos de madera y barandiella. Nel patiu caltiénense dos sepulcros de difícil datación.
La torre, de seición cuadrada, ufierta una gran austeridá de fachaes, namái interrumpida por llínees d'impostes y los vanos abiertos nos sos murios.
