Las Tertulias del Campoamor: Laura Marcos

Ye llicenciada en Filoloxía Inglesa, especialista en Filoloxía Asturiana y profesora d’Inglés na enseñanza pública d’Asturies. Tien dellos cuentos y poemes publicaos nes revistes Formientu y Reciella Malory; traducciones del inglés (W. W. Jacobs, Jonathan Swift, Herman Alexie) nes revistes Estandoriu y Campo de los Patos y una collaboración lliteraria nel llibru Castilletes de pozos mineros de la Montaña Central asturiana. Foi la encargada de la edición del llibru Testos en llingua asturiana na revista Asturias de Buenos Aires (1918-2005), publicáu pola Academia de la Llingua Asturiana, y correctora de munchos llibros y publicaciones n’asturianu. Dellos de los sos poemes apaecen n’antoloxía de la nueva poesía asturiana La prueba del once (2015).


Participa con un rellatu na antoloxía Hestories pa contales (Más nomes de muyer), qu’edita la escritora candasina afincada en Nueva York Paquita Suárez Coalla, así como na antoloxía Escritores asturianes, editada pola Conseyería d’Educación y Cultura nesti añu 2017 por cuenta la Selmana de les Lletres Asturianes como llibru regalu.


Laura Marcos ye integrante del Comité Central de la Timba Poétika, grupu de poetes (homes y muyeres) asturianes que llevan la poesía de pueblu en pueblu y de ciudá en ciudá pelos chigres y pub d’Asturies.


Cuentos de ser y tar (2017), volumen nel que recueye diez rellatos, ye la so primer obra publicada en solitariu.