Ún de Grao

Ún de Grao ye’l proyeutu personal de José Martínez Álvarez, guitarrista y cantante moscón afincáu en Xixón, y que lleva dellos años dedicáu a la música tradicional asturiana, participando en dellos grupos como 'Cuchu', 'Corzobeyos', 'Duerna', 'La Bandina'l Bache' que acompaña a 'Héctor Braga', 'Degañan's', o “Dobra”, formación del mayestru gaiteru Xuacu Amieva.


Esti nuevu camín pretende dar una visión personal de les extremaes formes d'evolución que pudiera tener la tonada y por estensión, cualesquier palu dientro la música tradicional asturiana.


Calteniendo’l respetu poles estructures y patrones tradicionales, esti moscón intenta echar un gabitu nel trabayu de xuntar o amestar la tonada y la música tradicional asturiana a otres corrientes, otros estilos, otres visiones, abrise a otres influencies y asina dexar que'l nuestru patrimoniu cultural vaya evolucionando y adaptándose a los tiempos d'anguaño.