El Palaciu de Ramiro I allugáu na falda del monte Naranco ye una construcción singular ensin una finalidá esclariada (palaciu, ilesia, pabellón real, aula regia, etc.). L'edificiu, de planta rectangular, ta estremáu en dos pisos, ún inferior o cripta que ye totalmente zarráu y una superior diáfana, xuníes por una escalera esterior.
La construcción, de cuidada mampostería, ta alzada sobre un zócalu de piedra pa imprimi-y un sentíu vertical que se refuerza colos contrafuertes estriaos que lleguen hasta'l teyáu.
El pisu inferior o cripta ye similar a la de Santa Leocadia, na Cámara Santa. Apórtase a ella dende l'esterior y ta totalmente abovedada reforciada con arcos de refuerciu.
Al pisu cimeru llégase dende la escalera esterior. Ye una sola estancia con miradores a dambos llaos y uns ventanes aximezaes qu'asemeyen otru pisu nuna de les sos cares.
Los miradores estructúranse en triple arquería que sofiten sobre columnes con fustes llabraos y capiteles corintios. Esteriormente, dende les ventanes escuelguen pegollos estriaos y con cruces que se rematen en medayones con figuración animal y humana.
L'interior, totalmente abovedáu, ta percorríu por arcos de refuerzu que repiten la decoración esterior de pilastres decoraos con remate de medayones.
Conceyu:
- Oviedo/Uviéu
