La ilesia de San Pedro de Nora presenta grandes afinidaes constructives y estilístiques cola ilesia prerrománica de Santullano, que dexen circunscribila nel mesmu periodu, el reináu d'Alfonso II El Castu (791-842).
La referencia documental más antigua ye del 20 de xineru del añu 905, fecha en que se conseña, nun documentu real, la so donación a la Catedral d'Uviéu por Alfonso III xunto cola de la Ilesia de Santa María de Bendones.
La so estructura ye la mesma que la de Santullano a pesar de tener delles traces distintes, como son l'ausencia de cruceru, arcaísmu constructivu.
La planta ye basilical, con trés naves separtaes por pegollos, cabecera rectangular tripartita empobinada al este y un pórticu, al oeste.
Los pegollos que dixebren de forma llonxitudinal les naves son cuadrangulares y sofiten cuatro arcos de mediu puntu de lladriyu, llixeramente peraltaos, a cada llau de la nave mayor.
La cabecera ye rectangular y tripartita. Les trés capiles comunícanse ente sí per una puerta, con arcu de lladriyu, abierta en cada muriu que les estrema y, tán cubiertes por bóveda de cañón sobre imposta, mientres que les naves faenlo con cubierta de madera.
Fecha de construcción:
Conceyu:
- Las Regueras
