El castru de San Isidro alcuéntrase sobre la llinia de cumes que señala la divisoria alministrativa ente los conceyos de Pezós y Samartín d'Ozcos, a unos 600 metros d'altitú. Nun ye ésta la única singularidá qu'ufierta, yá que tien un tipu de fortificación esceicional nel nuesu país: les piedres fincaes, tamién denominaes 'Caballos de Frisia'.
Les ruines estiéndense sobre una superficie llixeramente inferior a 1 hectárea, de la que bona parte ta ocupada poles fortificaciones. El visitante va poder observar nel so aproximamientu al cuetu la sucesión de fosos qu'arrodien l'accesu al recintu. Sobre los parapetos entemedios dispónense les piedres fincaes, socesives llínees de lloses de pizarra verticales interpuestes, bien eficaces pa enzancar el pasu al enemigu. Tres ellos álzase una monumental muralla, de 3 metros d'anchor, con un trazáu que dexa realizar un percorríu completu al recientu. Nes zones escavaes pue observase la fondura orixinal de los fosos y orixe de los parapetos, el paséu de ronda interior de la muralla o dalguna de les construcciones descubiertes nel interior del recintu.
La fundación del castru paez tar venceyada col establecimientu d'unidaes militares y el control de les mines d'oru que Roma esplotó mientres los sieglos I y II de la Era.
