L'ámbitu xeográficu de Barayu oxetu de proteición ocupa'l tramu costeru que va de la Punta d'Arnáu o Romanellos a la de Los Aguiones, incluyendo la sablera; l'estuariu; el complexu de dunes de Barayu; la sablera de Sabugo o sablera d'Arnela; la superficie de rasa costera que llenden dambes sableres; los cantiles y los castros de Pedroña y Romanellos.
El ríu Barayu, llende natural de los conceyos que separta, forma na so desaguada un espectacular estuariu d'altu valir natural y calidá paisaxística. Tres l'estuariu, el calce escurre pelos antiguos terrenos baxos llamargosos pa facer nel tramu últimu un bruscu xiru al oeste, obligáu polos gordones dunares de la tresplaya, onde se caltienen en bon estáu les comunidaes de dunes embrionaries y secundaries.
Tres les dunes, el ríu forma meandros arrodiaos de xuncales y cañaberales. A midida que s'amenorga la influencia salina de la mar, les marxes del calce puéblase de les especies carauterístiques de la ribera: omeros y sauces que formen una frondosa viesca en galería. La esistencia de zones buelguices dexa esta escelente representación de grupos d'omeros, occidentales y pantanoses, riques n'especies típiques de la clase Phagmitetea; desaxeradamente escasa nel país.
Cantiles y pendientes de lladera completen esta fascinante redolada, onde tán representaos de forma escelente los complexos de vexetación de cantiles típicos de la mariña occidental asturiana.
Información:
Flora:
Fauna:
Localización:
Barayu alcuéntrase ente los conceyos de Navia y Valdés, incluyendo, pel cantil, dende la Punta Romanellos hasta la Playa d'Arnela.
