El Monte Areo ye'l principal accidente xeográficu de la rexón del Cabu Peñes. Trátase d'una pequeña sierra que s'alza al oeste de Xixón. El so altor nun algama los 300 metros.
Anque los túmulos del monte Areo yeren conocíos dende'l sieglu XIX, nun pudo evaluase la importancia d'esti xacimientu arqueolóxicu hasta'l 1990, cuando una prospeición arqueolóxica atopó más de 30 túmulos. Estos repártense alredor de dos sectores: Los Llanos y les Güelgues de San Pablo. Estudiáronse trés túmulos y dos estructures d'interpretación problemática.
Los túmulos tán fechos por capes alternes de tierra y piedra. Tamién hai dos cámares funeraries de planta cuadrada, un dolmen de planta trapezoidal y un corredor curtiu d'un solu tramu. Esta última estructura adquier especial relieve, yá que los dólmenes de corredor son infrecuentes nel ámbitu cantábricu.
