Museo Etnográfico del Oriente de Asturias

Inauguráu nel añu 2000, el muséu tien el so orixe na donación de les cases y finca de Llacín, fecha nel 1994 por Teresa Sordo Sordo y Luis Haces Sordo, fíos de Porrúa y residentes en México. La donación animó a la creación de l'Asociación Cultural Llacín, que decidió promover, fundar y xestionar un muséu etnográficu, al envís de da-y a los bienes donaos una finalidá cultural y recreativa.

Los edificios del muséu atópense nuna finca d'una hectárea de superficie habilitada como parque públicu, con una amplia representación d'árboles frutales y de monte. Ente los árboles destaca la presencia monumental d'un aguacate trayíu de México y plantáu nel 1906. El perímetru del so tueru na actualidá ye de 7,20 metros.

El muséu pretende ser un centru cultural dinámicu comprometíu pa cola esposición y divulgación d'elementos d'interés históricu y etnográficu, pero tamién un llugar dedicáu a investigar y a protexer el patrimoniu cultural asturianu.

Les cases que formen el muséu tán dispuestes en dos fileres paraleles xuníes per aciu un corredor voláu de madera. Nel so interior visítense les dependencies d'una casa llabradora tradicional: antepar o estregal, cocina, sala, cuartu d'habitación, corte y llagar pa sidra, y una serie d'esposiciones temátiques dedicaes a la ellaboración del quesu y la mantega, la fabricación manual de texaes y lladriyos, procesos testiles, indumentaria popular tradicional, taller de carpinteru, ferramientes de corte de la madera, llavanderes, preseos y una colección de pieces de metal esmaltáu.