Esti equipamientu, con una esistencia que respuende a la esmolición qu'hai n'Asturies pel mundu marín, apurre una completa visión de les distintes actividaes, documentación, bibliografía y imáxenes de la vida marítima. Una vida que, nel casu que nos ocupa, ta contestualizada nun ámbitu d'actividaes industriales venceyaes a la mar, como ye la industria conservera, antaño bien puxante na contorna del Cabu Peñes.
Ello ye qu'a pocos quilómetros del muséu, na vecina villa marinera de Candás, s'atopa l'antigua fábrica de conserves Albo. Tamién bien cercano a Lluanco ta'l Conxuntu Históricu de les Mines de Llumeres, antigües mines de fierro, onde entá pueden contemplase los edificios orixinales, que daten del sieglu XIX, y un pequeñu y románticu puertu que se construyó 'exprofeso' pal tresporte del mineral hasta Xixón y, ellí, a La Felguera... Vieyes historia de mar y de mina, con una buelga que siempre ye prestosa pal visitante que ta en busca de descubrimientos.
