Muséu Evaristo Valle

El Muséu Evaristo Valle, constituyíu nel 1981 como fundación cultural, ye frutu del ciñu y l'arrogancia de María Rodríguez del Valle -sobrina del pintor-, que dende la so muerte nel 1951 axuntó con almirable celu obres, oxetos personales y documentos del artista que güei integren los fondos del muséu, a los que xunió una dotación y la so residencia con dos edificios en Somió (Xixón): ún d'ellos construyíu espresamente pa muséu nel 1971; l'otru, un antiguu pequeñu palaciu de finales de sieglu XIX, reformáu nel 1942 y adaptáu darréu a los nuevos fines.

Dambos edificios atópense dientro d'unos espectaculares xardinos históricos, B.I.C. (Bien d'Interés Cultural) dende'l 2016, amiestu de xardinería francesa y inglesa, que con más de 16.000 metros cuadraos caltienen, depués d'un sieglu, bona parte del trazáu, elementos ornamentales y munches de les sos 120 especies distintes d'árboles y parrotales, na so mayoría autóctonos.

El muséu forma asina un marcu incomparable que, cargáu de murria, ta en perfeuta sintonía tanto cola obra y la personalidá d'Evaristo Valle como cola de la so fundadora. Nos xardinos espónense cerca de cincuenta escultures d'arte contemporaneo y un espaciu dedicáu al bonsái.

Con independencia de les esposiciones temporales, actividaes educatives y musicales, el muséu exhibe de forma permanente más d'un centenar d'obres de Evaristo Valle, qu'entamaes de forma cronolóxica, temática o téunica, permite al visitante averase al so fondu, variáu y ricu legáu dibuxísticu y pictóricu.

Exhíbese d'igul forma, xunto a la reconstrucción del so estudiu, la suxerente coleición de conches heredada pol pintor del so padre.