Aula del Mar de Llanes

L'aula ta allugada nun antiguu mataderu rehabilitáu, de principios del sieglu XX. Convirtióse nun centru de referencia de vivencies marines, con temes que tomen dende la caza de la ballena na Edá Media hasta la emigración a América.

Per aciu distintos dispositivos, una puesta n'escena suxerente y cola recuperación d'oxetos y semeyes inédites, amuésense aquelles temes que s'esprenden de la rellaición de los llaniscos y la mar. L'Aula del Mar consta de dos plantes, atopándose delles seiciones en caúna d'elles.

Na primer planta pue contemplase, ente otres coses, una seición dedicada a la pesca de la ballena, que tanta tradición tuvo nos puertos del Cantábricu, y nel de Llanes sobre manera; otra seición compuesta por distintos instrumentos de pesca (na so mayoría yá non utilizaos); asina como otros tipu d'oxetos que destaquen pol so valir históricu.

Na segunda planta podemos observar delles seiciones. La primera qu'atopamos ye un rincón qu'alluga la historia de Llanes. De siguío tenemos una sección dedicada a recordar embarcaciones antigües del Puertu de Llanes, según semeyes y oxetos que recuerden la importancia que la industria conservera tuvo nel conceyu.

Siguiendo'l percorríu atopámonos con un apartáu dedicáu a recordar la emigración llanisca a distintos países d'América, utilizando casi siempre pa ello grandes barcos que salíen de distintos puertos del Cantábricu.

Nel final del percorríu podemos sentanos a visualizar un vídeu, con un montaxe que se centra na importancia que la mar tuvo, tien y va tener pa les xentes de Llanes. A too esto xunimos delles sorpreses pal visitante, como xuegos interactivos o histories de la mar que se pueden sentir al traviés d'auriculares.