Archivu Históricu d'Asturies

L'edificiu de l'Antigua Cárcel d'Uviéu ta asitiáu en Ciudá Naranco. Identifícase pola cúpula, el remate del centru de la 'estrella' que formen les sos galeríes.

Foi construyíu ente'l 1886 y el 1905 no qu'entós yera l'arrabalde de Ferreros. Inauguráu nel 1907, l'edificiu respuende al denomináu modelu panópticu (tipoloxía d'establecimientu penitenciariu propia del sieglu XIX), con una retonda o cuerpu central poligonal destináu a vixilancia, de la que sal una estructura radial que traza una estrella de cinco puntes, na que taben les galeríes. El conxuntu tien trés pisos y el cuerpu central zárrase con una torre decagonal rematada con una cúpula con llinterna.

Tol conxuntu ta arrodiáu por una muralla, con paséu de ronda y garites, circulares y almenadas, nes esquines. Fora d'esa muralla construyóse'l pabellón d'alministración.