V Alcuentros de Músiques Asturianes: La Bonturné

Esti cuartetu de maestros, conocíos de la escena musical como integrantes de formaciones de folk, pop y jazz, como La Bandina o Eye in the Sky, participaron y collaboraron colo más variao de la música asturiana (Folkgando, Anabel Santiago, Dixebra, J.V. & Carrio Latin Jazz, Rossaleda, Lliberdón, Dark La Eme, Pauline en la Playa, etc.). avéranos a un repertoriu adautáu pal baille nuna llinia mui rellacionada col 'bal-folk' européu, axuntando conocimientos clásicos y maestría na espontaneidá xunto cola capacidá d’improvisación y el frescor creativu, tresmitiendo un prestosu y singular soníu. Nos últimos años, amás d’una bayura conciertos y grabar un tema pal recopilatoriu infantil 'Bestiariu 2', rescampla’l so trabayu desarrolláu en Breizh, collaborando con Alain Pennec, Arnaud Ciappolino y Roland Conq, Gilles Servat, Kevren Alré o Roñsed Mor, ente otros.

Anguaño, La Bonturné, formada por Merce Santos (zanfoña), David Varela (acordión diatónicu y voz), Santi Caleya (gaita y saxu sopranu) y David Casillas (contrabaxu), ta preparando'l so primer discu.