El documental del mes: 'Todos los gobiernos mienten'

Nos años 60, la columna selmanal del periodista norteamericanu I.F. Stone marcó una dómina esmazcarando la corrupción y les mentires del gobiernu con una información veraz, contrastada y independiente. Nos tiempos actuales, onde la mayor parte de los medios de comunicación formen parte de grandes imperios mediáticos sometíos a los intereses de gobiernos y corporaciones, la reivindicación de la figura d'I.F. Stone ye más necesaria que nunca.

Los protagonistes de la película, una nueva fola de periodistes d'investigación de medios independientes de los Estaos Xuníos, recuperen el so llegáu y dan la cara pa defender el derechu de los ciudadanos a aportar a una información llibre d'interferencies, contrastada y honesta. 'Tolos gobiernos mienten' pon cara y da voz a los nomes qu'hai detrás de temes tan espinoses como'l casu Snowden, les foses comunes na frontera con México o la violación del derechu a la intimidá de los ciudadanos. Glenn Greenwald, Jeremy Scahill, Amy Goodman y Michael Moore, ente otros, ufierten el so testimoniu nun documental producíu por Oliver Stone.

El direutor del documental, Fred Peabody, ye periodista ganador d'un premiu Emmy nel 1989 por 'Free to be wild', documental sobre caballos esfamiaos rescataos d'abusos. Mientres siete años foi direutor del aclamáu programa d'investigación 'The Fifth Estate' pa la CBC, la televisión pública canadiense. Nel 2003 foi productor del documental 'Perfect illusions', sobre los trestornos alimenticios ente los mozos y emitíu pola PBS.

Direición: Fred Peabody.
Nacionalidá: Canadá (2015).
Duración: 90 minutos.
Llinguaxe: Versión orixinal n'inglés subtitulada en castellanu.