'Sutra', de Sidi Larbi Cherkaoui & Sadler's Wells London

En mayu del 2007, el mozu coreógrafu belga Sidi Larbi Cherkaoui visitó per primer vegada'l templu de Shaolin, en China, llar de monxos budistes dende'l 495 a.C. El viaxe conviértese nuna esperiencia sensorial dafechu estremada de tolo que viviera antes.

Inspiráu na figura de Bruce Lee y na habilidá, fuercia y espiritualidá d'aquella redolada, Cherkaoui, l'escultor Antony Gormley y el compositor Szymon Brzóska allumen una coreografía mística más allá del cuerpu, la tradición y la modernidá. Sobre l'escenariu, caxes de madera altes como homes, caxes que son al mesmu tiempu cames, ataúdes, parés y templos. Caxes llenes o vacíes. Caxes qu'escuenden posibilidaes infinites. Y el poder de la meditación, la enerxía de les emociones, les artes marciales y el budismu.

Cola participación de Sidi Larbi Cherkaoui, Antony Gormley, Szymon Brzóska y 21 monxos del templu de Shaolin.