SACO 7: Jordi Sabatés recrea a Segundo de Chomón

Espectáculu del pianista y compositor Jordi Sabatés, una propuesta deliciosa que nos permitirá descubrir la obra del pioneru Segundo de Chomón (Teruel 1871-París 1929), cineasta xenial que revolucionó'l cine de la so época con innovadores conceptos que siguen almirando güei pola calidá téunica y artística. Sabatés compunxo unes pieces integraes dafechu nel ritmu y la dramaturxa del cineasta, consiguiendo una simbiosis estraordinaria ente cine y música.

Sabatés interpreta al pianu la música que creó pa 14 de les películas de Chomón, desvelando y poniendo en valor la sorprendente modernidá de les mesmes. Paez como si la música de Sabatés activara la pionera máquina de suañar que nos dexó Segundo de Chomón: dos collacios que dialoguen y se dan la mano al traviés del túnel del tiempu.

La pantalla del Campoamor, al compás de la música, convertiráse en ventana máxica que nos revelará territorios desconocíos poblaos de sorpreses continues: personaxes insólitos, animación d'oxetos, de solombres, de muñecos y un cientu d'efeutos especiales, célebres precursores de los que s'utilicen anguaño. Poseyíos por eses maraviyoses y hipnótiques imáxenes en total sincronía cola música, nun podemos dexar d'entruganos: ¿Pue que Segundo de Chomón tamién, de dalguna manera, recrea a Jordi Sabatés?