Pompa y circunstancia

La esposición, con fondos de la Fototeca del Muséu del Pueblu d’Asturies, amuesa una visión de conxuntu de la importancia y dimensión que tuvo l'arquiteutura efímera n'Asturies, con manifestaciones d'una relevancia singular, tanto dende'l puntu de vista históricu como estéticu. Comisariada pol historiador Héctor Blanco, la muestra compónese d'una escoyeta d'ochenta fotografíes y trés litografíes, que van dende los pabellones y arcos que se llevantaron n'agostu de 1858 con motivu de la estancia en Xixón d'Isabel II y la so familia hasta les carroces arquiteutóniques de la cabalgata de Reis Magos del 2020.

'Pompa y circunstancia' compleméntase con una proyeición de 40 imáxenes dedicaes al Pabellón d'Asturias na Exposición Universal de Sevilla del 1992, proyeutáu polos arquiteutos Ramón Muñoz y Antonio Sanmartín, que formó parte del recintu de la isla de La Cartuja ente'l 1992 y 1993, y que se trasllladó y reedificó nel 1994 nel Muséu del Pueblu d’Asturies.