Lucas XV (ENTRAES ESCOSAES)

Adientrase nel cancioneru tradicional asturianu, tan ampliu y, sicasí, inoráu, reinventalu y actualizalu, faciendo con él un discu de rock. Con esta idea en mente, Xel Pereda y Nacho Vegas entamaron a trabayar nel 2006 sobre una esbilla de más de sesenta temes tradicionales asturianos acompañaos de Chus Naves al pianu y órganos, Luis Rodríguez nel baxu y Manu Molina na batería. L'alcuentru acaba dando llugar al únicu álbum asoleyáu de Lucas XV nel 2008. Una grabación orgánica y urxente na que los cantares garren vida.

Unos años depués, Xel Pereda retoma'l proyeutu y conforma, en solitariu, el repertoriu pa un segundu discu, 'In memoriam', que nunca llegó a ver la lluz, pero los sos temes van facelo agora pa esti conciertu, nun formatu crudu, escuru y primitivu.