L.E.V. Festival Xrmass: 'Symphony of Noise' y 'Planet LEV VR'

L.E.V. Festival Xrmass ufre ente'l 21 y el 24 d'avientu dos esperiencies de realidá virtual, 'A Symphony of Noise VR' y 'Planet LEV VR', nel Teatru de la Llaboral.

'Symphony of Noise VR'

De Michaela Pnacekova y Jamie Balliu, ye una historia al traviés del soníu. Pon el dispositivu de realidá virtual y embarca nesti viaxe inmersivu per un mundu surrealista y tentador nel qu'escucharás el to cuerpu y la to vida cotidiana como nunca lo fixeres, descubriendo la música qu'hai dientro de ti.

Esta esperiencia de realidá virtual sónica y interactiva, a escala real y pa un usuariu únicu, ta inspirada nel llibru de Matthew Herbert 'The Music', nel que l'artista y músicu crea paisaxes sonoros por asociación na mente del llector.

Planet LEV VR

Dende Llaboral tamién podrás viaxar per dispositivos de realidá virtual a un planeta alternativu agospiáu nel ciberespaciu cola esperiencia 'Planet LEV VR', un universu creáu por Children of Cyberspace y coproducíu por L.E.V. y el Centro de Creación Contemporánea Matadero Madrid, nel qu'esploraremos un paisaxe dixital oníricu inspiráu n'Asturies, con un percorríu que supón una esperiencia artística en sí mesma, y qu'alberga escultures animaes y instalaciones audiovisuales d'artistes estatales y internacionales.