Les Nueches Máxiques del Botánicu

El Xardín Botánicu Atlánticu presenta la decimoquinta edición de les sos Nueches Máxiques, un alcuentru nocherniegu cola naturaleza, el misteriu y la tradición que s'axunten nun espectáculu distintu.

Nesti mesmu llugar fai enforma tiempu esistió un formosu monte atlánticu nel que crecíen magníficos árboles como los carbayos, los fresnos y los omeros, y que taba pobláu d'animales y de seres fantásticos nos que creíen los antiguos ástures, que con ellos convivíen. Como siempres asocede, los nuevos tiempos fixeron qu'aquel enorme monte viérase amenorgáu, aumentó la población, valtáronse árboles, caváronse tierres y los antiguos ástures, adulces foron dexando de creer nestos seres prodixosos que quedaron apostraos al mundu de los cuentos y les lleendes. Pero ¿fueron sumiendo del too? Pues non, non del tou. Tres esos árboles habiten dalgunes d'eses criatures, práuticamente dende l'entamu de los tiempos.

Los nuesos texos, poderosos y llonxevos, álcense nel tronu de la nuesa visita nocherniega, animando a esos personaxes fantásticos del Xardín Botánicu Atlánticu a danciar una vegada que probaron la so máxica cazumbre. So ellos acovécense les fiestes, les tradiciones, la fantasía d'unos personaxes que lleven años y años ablucando a los pasiantes nocherniegos nes Nueches Máxiques: los Trasnos, el Diañu Burllón, la Xana, la Güestia, el Busgosu o'l Trasgu y el Trasguín van sosprender a los visitantes a lo llargo d'un percorríu per distintos paraxes del llugar.