'La bestia negra', de Compañía Proyecto Piloto (ESTRENA ABSOLUTA)

La Salpêtrière ye, anguaño, un hospital de París. Un hospital más. Pero a lo último del sieglu XIX foi un llugar habitáu por 4.000 muyeres (mendigues, fíes del adulteriu, güérfanes, ciegues, prostitutes, bohemies, lesbianes y un llargo etcétera) que vivíen ente la realidá del so día a día naquel sitiu y la representación teatral, esaxerada, exhibicionista y fotografiada de la so supuesta enfermedá: la histeria.

Tolos martes convidábase a estudiosos y médicos (toos homes, por supuesto) a presenciar los presuntos ataques d'histeria d'aquelles muyeres. Y, elles hipnotizaes, agotaes (podemos imaxinar) y claudicando énte lo inevitable, nun facíen más que cumplir colo esperao.

¿La histeria yera poro una invención? Seguramente. Cualquier circunstancia naquella época podía dar llugar al temíu diagnósticu: ¿Mientes? Yes una histérica. ¿Tas nerviosa? Yes una histérica. ¿Engañes al to maríu? Yes una histérica. Histérica. Histérica…, y asina hasta güei.

Esti espectáculu ye, de dalgún mou, un homenaxe a toes elles, pero tamién un intentu d'entendeles y, entovía más, de quereles. Oxalá daquién, en dalgún momento, mirárales con amor. Oxalá.

• Direición: Borja Roces.
• Composición y interpretación musical: Verónica Rodríguez Álvarez.
• Intérpretes: Izar Gayo, Andy Bilbao y Rebeca Tassis.
• Escenografía: David Martínez Suárez.
• Visuales: Cristina Busto.
• Illuminación: Pelayo Rodríguez.
• Vestuariu: Patricia Vázquez.
• Producción: Raquel Martín Tassis.
• Comunicación y prensa: Marta Barbón.

Premiu Xovellanos a la Producción Escénica.