Gijón Sound Festival: Christian Löffler

Productor, compositor y DJ alemán, ta consideráu ún de los principales representantes de la nueva electrónica emocional. Ye la so música un amiestu d'euforia y señardá, asina como tamién de ciertu calter desapacible que-y sirve pa coneutar col mar Bálticu y la xeografía del nordeste alemán onde creció.

Löffler cofundó en Kölle nel 2008 el sellu Ki Records, onde espublizó'l so primer EP, 'Heights', y nél dio salida dende entós a la mayor parte de la so discografía (tien una docena d'EPs más). Foi col so LP de debú, l'espléndidu 'A Forest' (2012), una exhibición de techno ambiental, col que trespasó fronteres, repitiendo'l golpe con 'Mare' (2016), nel qu'adoptó un enfoque más orgánicu (grabaciones de campu incluyíes).

Colos sos dos trabayos últimos siguió xubiendo'l nivel. Trátase de 'Lys' (2020) y el más que sorprendente 'Parallels' (2021), ésti últimu un homenaxe esperimental y electrónicu a Beethoven, onde reellabora dalgunes de les obres orquestales del llexendariu compositor.