Frágil, de Juan Pablo Moreiras

Vivimos nun planeta que se tresforma ensin fuelgu dende fai 4.500 millones d'años, pero'l gran impactu ambiental que'l desenvolvimientu humanu recién ta teniendo sobro'l nuesu propiu hábitat ta favoreciendo un desequilibriu cada vez mayor ente'l ser humanu y el restu de los seres vivos. L'home ye l'únicu animal que destrúi'l mediu onde vive, gracies a la so estraordinaria capacidá pa modificar y afaelo a les sos necesidaes; mientres collecha un ésitu arrollador pa sigo mesmu, alteria fondamente la so redolada a gran velocidá poniendo en peligru'l so futuru como especie. Contamina l'agua, l'aire y el suelu. Faise necesariu un consumu responsable si queremos ralentizar los procesos de deforestación, de desertización y de perda de biodiversidá, pero la sociedá aumenta la demanda de materies primes a un ritmu vertixinosu, mientres la so población multiplícase.


Mientres los postreros venticinco años el fotógrafu Juan Pablo Moreiras percorrió xuna trentena de países pa captar con fotografíes momento que traten d'amosar la relación qu'esiste ente'l paisaxe, la fauna, la flora y el ser humanu. Dacuando, estes fotografíes cúntennos d'una manera clara cómo l'home ta tresformando la so redolada natural, pero tamién nos revelen intres d'una relación intensa de les persones col so mediu. Les imaxes pueden ser extraordinariamente eficaces pa cuntar una hestoria interesante, y los fotoperiodistes tienen la enorme responsabilidá de faer llegar a un gran númberu de persones la so visión de lo que ta asocediendo. La fotografía de naturaleza, cada vez más presente nos medios de comunicación y nes redes sociales, ye una ferramienta poderoso para documentar y sopelexar la diversidá del mediu natural, los problemes y les soluciones, aguiyando al públicu y convidándo-y a cavilgar con espíritu críticu sobro lo que nos arrodia.


La desigual sociedá humana demuestra a diariu que nun ye abondo consciente de la gran agresión ambiental que ta causando a esti mundu variao y fermosu, aparentemente ensin saber apreciar que la mayor ayalga que tenemos ye la Diversidá.