Encaja2: Antón Menchaca

Antón Menchaca consolidóse como una de les apuestes más orixinales y arriesgaes del panorama musical asturianu, consiguió dalgo que paecía mui difícil: abrir la tonada a nuevos espacios físicos y sonoros. Belén Antón y Pedro Menchaca, procediendo de tradiciones musicales mui diferentes, algamen un axuntamientu musical suxestivu y perllibre.

Antón, poseedora d'una sólida formación na tonada asturiana con maestros como Ismael Tomás Montes o Anabel Santiago y dueña d'una voz repleta de matices y inflexones que sorprenden pola so sutileza y versatilidá, esbilla con criterio los cantares del repertoriu de l'asturianada que meyor s'ufren a ser actualizaes n'otros rexistros; Menchaca, guitarrista hiperactivu y arriesgáu, gran improvisador y militante en bandes heterodoxes como Cuac! o Senogul, da una visión vanguardista a la sonoridá del grupu, pa lo que nun dulda n'añadir toa mena d'artefactos y efeutos sonoros a les sos guitarres. El resultáu ye una versión actualizada, mui personal y mutante de la tonada asturiana.