'Dreaming Juliet', d'Elefante Elegante

La obra inspírase en 'Romeo and Juliet' de William Shakespeare p'abordar la cuestión más esencial de la esistencia humana: l'amor. Con un llinguaxe visual afitáu nel teatru de movimientu, na música interpretada en direuto y na danza, 'Dreaming Juliet' crea una poética universal de la pasión.

Na pieza orixinal los protagonistas viven un amor prohibíu y idealizáu, condenáu poles familias de dambos. La so intensa rellación tien una duración curtia y un final aciagu. Agora imaxinemos que Romeo y Juliet nun morrieren y que l'obstáculu principal a la so rellación nun fora la oposición de les sos familias, sinón les adversidaes de les rutines del mundu contemporaneu.

¿Cuáles seríen los suaños de Juliet? ¿Cómo avieyaría Romeo? ¿Qué llugar nes sos vides permanecería disponible pal amor?