'Cantando bajo las balas', de Teatro Kumen

Narra'l primer actu franquista oficial de la historia, n'ochobre del 1936, nel Paraninfo de la Universidad de Salamanca, con ausencia del propiu Franco, representáu pola so muyer, Carmen Polo. Dos de los presentes fixéronse col total protagonismu aquella mañana: el xeneral Millán Astray y don Miguel de Unamuno, que, pa espantu de toos, enfrentáronse con una violencia inesperada. Unamuno tuvo a piques de ser apalizáu polos lexonarios y falanxistes presentes, dalgo que, ensin dulda, socediera de nun mediar la proteición de Polo.

Aquella mañana vertiéron discursos llargos y confusos, los primeros ensayos de la monótona representación que se prolongaría mientres cuatro décades. Pero amás de toes aquellos razonamientos, arengues y sermones sobre dalgo llamao España, con ecos qu'entovía esisten nos nuesos díes, sintiéronse pallabres improvisaes que –esta vegada sí– proveníen del corazón de los homes que les pronunciaben. Millán Astray gritó 'viva la muerte', a lo qu'Unamuno replicó 'venceréis pero no convenceréis'.

Teatro Kumen.
Repartu: Roberto Sánchez, como Millán Astray.
Autor: Antonio Alamo.
Direición: José Ramón López Menéndez.