Adrián Prado: I am fine

El tiempu tou lo cura, y nunca va haber una verdá más real qu'esa. Pero hasta qu'esi tiempu pase, ye inevitable crear un llaberintu de sentimientos, una combinación d'esperanza y pesimismu capaz de volver llocu a cualesquier. Asina surde I am fine (traducíu al asturianu como ‘toi bien’), una amuesa fotográfica basada nuna esperiencia personal, concretamente una rotura sentimental; una situación protagonizada poles duldes, por querer y nun querer, por intentar tar bien mientres llevamos un cartelu lluminosu na frente que diz “toi mal”. Tou eso nun dexa de ser una mázcara pa que nadie s'esmoleza por nós, y porque no fondero gústanos creer que realmente tamos bien. Pero non. Lo cierto ye que nada se supera d'un día pa otru, porque nun somos máquines, y dacuando paez que vivimos nun mundu nel que ta mal vistu nun sentise siempres bien. Anque eses males dómines tamién tienen daqué bonu, y ye que saquen el nuesu llau más creativu, dramáticu y deshonestu, nel que somos capaces d'esaxerar toles emociones hasta una llende propia del teatru. Una llende que quería algamar con esta esposición, formada por 14 semeyes tan sencielles como directes. Que xuba'l telón.