'Úrculo: El enigma del viajero'

Referente del pop-art nel Estáu y iconu del arte asturianu por adopción, nel venti aniversariu de la so muerte Eduardo Úrculo (Santurtzi, 1938-Madrid, 2003) amuesa que la so rellumante obra ta más viva que nunca con la esposición 'Úrculo: El enigma del viajero'. La muestra, comisariada por la Dra. Alicia Vallina, constitúi una metáfora del tránsitu qu'él mesmo adoptó como ún de los motivos principales del so arte, para asina percorrer el so mundu personalísimu de deseos y fantasíes, sondiando al traviés de les sos obres la naturaleza observadora y infantil que poseyía, al traviés de la provocación de lo imaxinariu, d'un universu estéticu en movimientu, siempre dialogando cola propia esistencia.

Esta esposición pretende ser un percorríu pola evolución del trabayu vital d'Úrculo, gracies a un compendiu de cien litografíes, dibuxos, óleos, acrílicos, témperes, escultures en bronce o grabaos procedentes de la coleición del so únicu fíu, Yoann Úrculo, y de dellos fondos artísticos particulares, asina como una escoyeta de preseos y oxetos personales del artista que persuaden al visitante na atmósfera creadora del “pintor que fai escultures”, como él mesmu se definía. En definitiva, una aventura estética que transita peles diverses etapes del artista, dende la del artista desarraigonáu, gris, desesperáu y en busca de la continuidá de los sos primeros años, hasta l'Úrculo viaxeru, misteriosu y silenciosu, entregáu a una visión cosmopolita del arte, pasando peles creaciones informalistes, clandestines, cargaes de deséu y color, sexualidá, erotismu y inmoralidá del so periodu de tránsitu.