'¿Persiguióse l'asturianu nel Franquismu?', d'Inaciu Galán / ANULADA

Embaxo'l títulu '¿Persiguióse l'asturianu nel Franquismu? Repás hestóricu a la situación de la llingua asturiana na dictadura' Inaciu Galán va afondar na situación de la llingua asturiana nel periodu de la dictadura de Francisco Franco, faciendo un repás a la ideoloxía que’l franquismu construyó sobre la so idea d’España en rellación a les llingües del Estáu y l’aplicación qu’ello tuvo na llexislación creada pa la xestión y represión d’esta realidá multillingüe. La conferencia va tar basada na so tesis 'La llingua asturiana nel Franquismu', que foi reconocida con Sobresaliente cum laude y ta propuesta a Premiu Estraordinariu de Doctoráu, onde apaecen casos qu’ilustren la represión llingüística xeneralizada que se vivió nes escueles demientres la dictadura.

Ye tamién tema d’estudiu’l papel del Instituto de Estudios Asturianos (IDEA), asina como la situación de la lliteratura escrita n’asturianu, mesmo n’Asturies que nel exiliu. Sobre la etapa última del Franquismu, la tesis fai una revisión del papel de l’asociación Amigos del Bable, fundada en 1969 y pieza clave pa entender l’apaición en 1974 del asturianismu modernu que supón Conceyu Bable.