La neña de les trences al revés

Thana miraba pa la lluna. Asomada al ventanucu de la so casa de la collada camentaba cómo-y prestaría poder falar con una neña como ella. Al otru llau del mundu, Deva dibuxaba estrelles. Con un llapiceru diba semando la fueya de puntinos. Nel centru de toos ellos la lluna. Thana vive al final del desiertu del Sáhara, nun país que se llama Mali. Deva vive nuna ciudá d’Asturies, pero nunca salió fuera d’España, ¡y menos a África!