LXXVI Temporada de Ópera de Oviedo: 'Manon'

'Manon' de Jules Massenet inaugura'l ciclu llíricu 2023/2024 de la Ópera de Oviedo, que sigue festexando los 75 años d'historia operística na ciudá, na so segunda etapa. El títulu escoyíu nun ye casual, yá que foi'l mesmu col qu'alzaba'l telón el 18 de setiembre del 1948 el Teatru Campoamor llueu de les obres de reconstrucción del coliséu uvieín.

La música de 'Manon' conforma una serie d'imáxenes romántiques de la vida. Cola so ópera Massenet quería facer un monumentu al rococó francés, en clara oposición al mundu del Ancien Régime.

Precisamente un cuadru del primer rococó pintáu por Antoine Watteau, 'L'indifférent' (1716), inspira a Emilio Sagi la so puesta n'escena. El compositor, consideráu'l más importante de Francia nel sieglu XIX, aprovecha'l testu de Meilhac y Gille p'adaptalu con una sutileza, un llirismu y una poesía inimitables.

El montaxe que'l públicu va poder ver ye una producción de la Ópera de Oviedo, el Teatro Municipal de Santiago de Chile y la Ópera de Tenerife. El direutor portugués Nuno Coelho dirixe la obra y debuta nel fosu del Campoamor al frente de la Orquesta Sinfónica del Principáu d'Asturies (OSPA), de la que ye nuevu direutor titular dende la seronda del 2022.

Sagi encárgase de la escena con un repartu encabezáu por Sabina Puértolas, Celso Albelo y Roberto Scandiuzzi, ente otros. Completa la producción el Coro Titular de la Ópera de Oviedo (Coro Intermezzo), dirixíu pol so direutor Pablo Moras.

Repartu: Manon Lescaut (Sabina Puértolas y Alexandra Nowakowski); El Caballeru Des Grieux (Celso Albelo y Juan Noval-Moro); El Conde Des Grieux (Roberto Scandiuzzi y Frederic Jost); Lescaut (Manel Esteve y César San Martín); Guillot de Morfontaine (Moisés Marín); De Brétigny (Pablo López); Un posaderu, porteru y croupier (Abraham García); Poussette (Ana Nebot); Javotte (María Heres); y Rosette (Serena Pérez).

Direición musical: Nuno Coelho.

Direición d'escena: Emilio Sagi.

Diseñu d'escenografía: Daniel Bianco.

Diseñu de vestuariu: Pablo Núñez.

Diseñu d'illuminación: Eduardo Bravo.

Direición del coru: Pablo Moras.