Orquesta Sinfónica Mercadante (Conciertu inaugural de la temporada de la Filarmónica)

La Orquesta Sinfónica Mercadante, de creación reciente, promovióla'l so direutor titular, l'asturianu Mariano Rivas. Tolos músicos de la orquesta son miembros o formaron parte de les meyores agrupaciones orquestales, conservatorios superiores y teatros de la Comunidad de Madrid y quixeron sumase a esti proyeutu de calidá.

Saverio Mercadante foi un compositor italianu del sieglu XIX con un venceyu mui especial con Asturies gracies a dos de les sos óperes: escribió pal Teatru La Fenice de Venèsia 'La solitaria delle Asturie' (1840), ópera que ta siendo trescrita pol propiu direutor usando fontes primaries veraces pa ser espublizada la so edición crítica, asina como la so estrena mundial absoluta moderna, y 'Pelagio' (1857), la que fora la so última ópera terminada, ofrecida al Teatru Xovellanos nel 2005, na so edición práutica en versión de conciertu, con Carlos Álvarez y Alejandro Roy como protagonistes cola Orquesta Sinfónica del Principáu d'Asturies (OSPA), dirixida pol propiu editor. Nesti conciertu en Xixón va interpretar la 'Misa de Réquiem en re menor, K. 626', de Wolfgang Amadeus Mozart, basada nos testos llatinos pal réquiem, esto ye, l'actu llitúrxicu católicu celebráu llueu de la muerte d'una persona.

Ye la decimonovena y última misa escrita por Mozart, que morrió nel 1791, enantes de terminala. El compositor Franz Xaver Süssmayr finóla, y el propiu autor, yá enfermu, dio-y numberoses indicaciones pa facelo.

Magar nun pudo ser terminada na so totalidá pol maestru austriacu, ye considerada como una de les obres más trescendentales de Mozart. Pa la so interpretación, la Orquesta Sinfónica Mercadante va contar cola participación de los solistes Anna Kabrera (sopranu); Alexandra Rivas, Krywenko d'apellíu de soltera (mezzosopranu); Quintín Bueno (tenor); y Ihor Voievodin (baxu).
 

• Conciertu entamáu en collaboración cola Sociedad Filarmónica de Gijón.