El as

Una pieza singular pa despidir un añu especial y atípicu. El Teatru Palacio Valdés pon el ramu al so centenariu cola representación n'esclusiva de la opereta 'El as', la mesma cola que s'inauguró hai un sieglu. Una producción encargada por la Conceyalía de Cultura d'Avilés al traviés de la Fundación Municipal de Cultura y fehca pola Fundación Ópera de Oviedo.

'El as' ye una comedia d'enriedu con situaciones inimaxinables, que trescurren nun hotel lluxosu d'una ciudá pequeña. Cuenta con un repartu coral conformáu por Maite de la Cal, como Niní; Gaspar Braña, como Belflor; Patricia Martínez, como Marcela; Fran Sierra, como Rogelio; Tamara Norniella, como Elisa; Vanessa del Riego, como Simona; Manuel Álvarez Lobo, como El As, y Enrique Fernández Dueñas, como Gustavo. Tien tamién un coru, con Ana María Pineda, como Lucia; Estefanía Álvarez Escotet, como Clara; Canela García, como Camarera 1, y Laura Rodríguez Armas, como Camarera 2.

L'adaptación que s'escenificará sobre la obra 'El as. Vodevil en tres actos', versión castellana de José Juan Cadenas y Emilio Sánchez Pastor a partir del llibretu d'Hennequin y De Gorsse, ye una función en dos actos preparada por Raúl Vázquez pa esta ocasión sobre la música de Rafael Calleja. La direición d'escena ye del propiu Vázquez y la direición musical, de Rubén Díez.