'Cielo abierto', de Antonio Guerra

El proyectu 'Cielo Abierto' d'Antonio Guerra (Zamora, 1983) forma parte del circuitu espositivu configuráu polos artistes becaos na Generación AlNorte 2020, dientro del programa de la XIX Semana de Arte Contemporáneo de Asturias. Esti trabayu, qu'amuesa'l Centru Niemeyer nel mes d'ochobre, analiza l'impautu de la industria minera sobre'l paisaxe, reflexonando sobre la rellación ente naturaleza y teunoloxía pa venceyar dicho impautu industrial colos procesos dixitales y la materialización de la imaxe.

L'artista documentó la mina zarrada de Corta Pastora utilizando como recursu de partida una tarxeta de memoria dañada que produz error na creación de la imaxe y crea bandes blanques (glitch=defeutu) nel procesamientu, cola fin de simbolizar la imposibilidá de definir l'alteración radical del entornu y la metáfora d'un pasáu deteníu. Esta propuesta interdisciplinar reinterpreta'l sentíu iconográficu de l'actividá minera y cuestiona, amás, les llendes de la fotografía y la so capacidá de representación pa buscar fórmules visuales nueves.