'Viejos hazmerreíres', de Les Luthiers

El grupu Les Luthiers, en plenu festexu de los sos 50 años de carrera, lleva a Uviéu el so espectáculu nuevu: 'Viejos Hazmerreíres'. Trátase d'una antoloxía de grandes ésitos de Les Luthiers, lo meyor d'espectáculos memorables como 'Los Premios Mastropiero', 'Todo por que rías', 'Por humor al arte' o 'Lutherapia', pero esta vegada renovaos pa formar parte d'una absurda tresmisión de radio, la recordada y prestosa 'Radio Tertulia, nuestra opinión… y la tulia'.


Los espectadores podrán volver a ver en direuto pieces como la zarzuela 'Las Majas del Bergantín', 'Quién mató a Tom Mc Coffee' o 'La cumbia epistemológica' intercalaos coles enseñances del gurú Sali Baba, los delirios del home que vio a los marcianos o los cantares del grupu imposible 'London Inspection'. Too presentao polos habituales esparates de Ramírez y Murena, los llocutores de 'Radio Tertulia', que comenten lo que venga, dende la estradición d'un narcotraficante hasta la fecundación asistida pasando pela terrible telenovela 'Alma de Corazón'.