Museo del Ferrocarril de Asturias

Corría la segunda metá del sieglu XIX y el Xixón fabril, industrial y obreru crecía ensin frenu. Elementu clave d'esta crecedera son les comunicaciones y el tresporte, y nesti contestu naz la Estación del Norte, que tresforma la redolada rural y tranquila d'El Natahoyo n'ún de los barrios proletarios más relevantes de la ciudá. La zona, llendada pel ferrocarril y el mar, y vertebrada pela carretera de Candás, conviértese en llugar d'asentamientu de numberoses industries, ente otres dalgunos de los astilleros más importantes del sieglu XX nel Estáu. El ferrocarril permitiría la salida al mar de mercancíes industriales y el tránsitu de pasaxeros pela exa central d'Asturies, dende Xixón a les cuenques mineres y viceversa. En definitiva, vertebraba la vida, la economía, los cambios sociales y la revolución industrial; foi un símbolu de progresu y conocencia.

Na actualidá too esa historia recién, y tol posu obrerista, industrial, teunolóxicu y social asturianu tien un esponente nidiu nel usu que se-y dio a la Estación del Norte de Xixón, cuando nel 1990 cesa la so actividá, finando asina con más de cien años d'historia y abriendo la conocencia, la cultura y l'ociu a les xeneraciones y viaxeros actuales al traviés de la so vida nueva como Muséu del Ferrocarril.