Al traviés de paneles interpretativos y cola ayuda de mapes, cronogramas y semeyes, el públicu pue facer un percorríu nel Centru de Recepción y Interpretación peles distintes etapes del arte prerrománico asturianu y pelos quince monumentos que formen esta arquiteutura. El centru tamién cuenta con maquetes de Santuyano d'Uviéu, San Salvador de Valdediós y Santa María del Naranco, y con un audiovisual, cedíu pol Muséu Arqueolóxicu d'Asturies, sobre los templos y construcciones que componen el Prerrománicu asturianu.
El públicu va poder esfrutar amás d'un puntu de consulta con llibros monográficos sobre los monumentos y sobre l'arte prerrománico asturianu. Pa los más pequeños cuéntase con un área específica na que van poder realizar los sos propios dibuxos de los monumentos asturianos mientres la visita al equipamientu.
Dispónse tamién d'un interactivo, en castellanu y n'inglés, nel que s'espliquen los detalles de los monumentos y les fases arquitectóniques d'esti arte.
