Asitiada nel conceyu de Pravia, de la basílica primitiva llevantada nel añu 780 namái queden dellos restos na nave central y nes muries llaterales. Constaba de trés naves con cruceru y trés capielles de planta rectangular. Sobre l'arcu d'ingresu al cruceru tenía una inscripción llaberíntica formada poles palabres Silu Princeps Fecit, y un antepar sirvía de Panteón Real. Los arcos yeren de mediu puntu sobre pegollos cuadraos, y la cubierta de madera.
L'altar mayor ye una réplica del orixinal, que s'atopa dende l'añu 1984 na cripta de la ilesia de Xesús Nazarenu, n'El Pitu (Cuideiru).
La espadaña, construyida nel 1868, que se llevantaba a los pies y que nun correspondía a la construcción primitiva, adosóse a la sacristía sur na última restauración realizada por D. Luis Menéndez-Pidal y Álvarez ente'l 1979 y el 1980.
Como restos prerrománicos caltién partes de les columnes del arcu de trunfu, dos pequeñes ventanes con arcu de ferradura, una de dos elementos iguales, y dellos restos catalogaos que s'atopen na sacristía.
Tien un interesante calvariu románicu nel brazu sur del cruceru.
Fecha de construcción:
Conceyu:
- Pravia
