Centro de Recepción Historias del Mar

Los romanos yá usaben nestes tierres los ríos y les ensenaes de la mariña pal so tráficu comercial, pero nun foi hasta la Edá Media cuando empiecen a apaecer pequeños puertos d'abrigu con fines comerciales y pesqueros con escasu tráficu de cabotaxe.

Ún de los usos a los que se dedicaron los puertos medievales foi la caza de los grandes grupos migratorios de ballenes. Nos sieglos XVI, XVII y XVIII foi una actividá bien estendida y los grandes señores llograben bonos beneficios permitiendo la so caza.

Sumíes les ballenes, los puertos siguieron la evolución de los tiempos: tráficu comercial, pesca d'altor y de baxura y, finalmente, el turismu. Sumieron los veleros y llegaron los vapores, más tarde sustituyíos poles motonaves. Vieyos oficios marineros permanecieron nos sos muelles: calafates, veleros, rederos y, mientres dalgún tiempu, conserveros que tresformaben el pexe.

Pero estes mariñes y puertos fueron testigos d'otru fenómenu humanu: la emigración a América. De la importancia social, económica y cultural son bona amuesa la gran cantidá de manifestaciones arquiteutóniques que esistentes nel llugar.

Cases d'indianos, equí conocíos a cencielles como americanos, pero tamién escueles, llavaderos, casinos, fontes públiques, parques... Una amuesa del amor pola so tierra de los que trunfaron na dura emigración.

Pue apreciase la buelga de los sieglos nes poblaciones portuaries, el so entrevesgáu caleyeru d'orixe medieval y los sos barrios de pescadores. Histories d'homes y muyeres que fixeron les sos vides mirando a la mar y tratando de domala anque ensin llegar a consiguilo nunca.

Ehí ta la socesión d'espectaculares sableres, cantiles, estuarios, cordones dunares, castros y roques que conformen un suxerente paisaxe que se caltuvo intautu hasta los nuesos díes. Un espaciu perfeutu pa los qu'amen la mar, la pesca deportiva, el bucéu, la vela y hasta llegar a acaballar les foles sobre tables de surf.