Sol en los Pomares, de Matías Conde

Matías Conde de la Viña (Xixón, 1896) desarrolló dende mozu les sos aficiones lliteraries, collaborando davezu en semanarios locales. Por cuenta la guerra civil, en 1937 emigró, primero a Francia y depués a México, onde vivió hasta 1982, añu en que morrió.

«Sol en los pomares», la so obra más renomada, qu'agora reedita l'Academia de la Llingua Asturiana col sofitu del Ayuntamientu de Gijón/Xixón, coincidiendo col 120 aniversariu de la nacencia de Conde, foi publicada en 1948 en México, con entamu del escritor José Vasconcelos ya ilustraciones del artista xixonés Germán Horacio, fíu de Pachín de Melás. Axunta poemes populares —costumistes, humorísticos, sentimentales…— n'asturianu.