Villa Romana de Veranes

Una villa romana ye una esplotación agropecuaria con dos partes estremaes: la zona residencial o pars urbana y la pars rústica. Na primera vive'l señor de la villa (pater families o dominus) y na segunda tán los espacios dedicaos a la esplotación del fundus, que ye'l territoriu perteneciente al propietariu de la villa, que suel concentrar grandes posesiones de tierra formando un latifundiu.

Los restos arqueolóxicos qu'anguaño se pueden visitar en Veranes pertenecen a la pars urbana d'un gran establecimientu de tipu villa que se construyó nel Baxu Imperiu (sieglu IV d. C.) sobre les ruines primitives d'un asentamientu rústicu altoimperial de considerable relevancia. Esta gran casa señorial, perteneciente a un notable propietariu, que de xuru se llamaba Veranius, presenta trés fases de reforma y ampliación arquiteutónica que se desenvuelven a lo llargo del sieglu IV d. C. La casona siguió n'usu hasta'l sieglu V d. C.

El conxuntu organízase en cuatro terraces escavaes na fastera, que s'estienden per una superficie cercana a una hectárea. Dende un puntu de vista tipolóxicu, pue definise como una villa de tipu llineal con galería de bloque compuestu.

La entrada principal de la villa ta nel llau oeste y da accesu al patiu norte. A la izquierda d'ésti asítiase l'área de servicios (horru, cocina y fornu) y a la derecha, la entrada al restu de les dependencies. Una llarga galería cubierta o logia conduz a los espacios de representación asitiaos nel sector oriental del complexu y destinaos a la vida social y política.

Al sur alcuéntrense una sala de tar o exedra, un gran comedor o triclinio que remata n'ábside, y los baños o termes qu'ocupen el frente meridional de la villa.

Al norte destaquen l'habitación del señor (diaeta) y una nave rectangular qu'antecede al principal espaciu de recepción (oecus) ceremonial o magna sala de representación pavimentada con un mosaicu polícromu. Nesta estancia'l señor de Veranes recibía a la vecería y a les embaxaes públiques o privaes, y exercía el so dominiu sobre xentes y tierres a un nivel casi equivalente al del propiu emperador.

La configuración d'estos espacios dexa suponer que'l percorríu ceremonial que realizaben los visitantes de la villa principiaba na entrada del patiu norte, per onde se llegaba a la gran logia abierta al mediudía, con un percorríu que conducía a les sales principales de representación.

direccion: 

33393 Veranes (Xixón)

telefono: 

985 185 129 / 629 755 409

web: 

http://museos.gijon.es

horario: 

16 setiembre a 15 xunu
Llunes a Domingu: 10:00-14:30 y 16:00-19:00 h

16 xunu a 15 septiembre
Martes a Domingos y Festivos: 10:30-19:00 h

Selmana Santa
Martes a Domingu: 10:00-17:00 h

Llunes pesllao

Zircon - This is a contributing Drupal Theme
Design by WeebPal.