Aula Didáctica del Prerrománicu Asturianu de la Cobertoria

Agospiada nun edificiu singular, l'aula foi concebida como un equipu cultural eminentemente didáuticu y divulgativu.

Pa ello foi dotáu de paneles ordenaos temáticamente en cuatro seiciones, afaciéndose a la distribución interior del propiu edificiu: introducción al aula, el Reinu d'Asturies, l'arquiteutura asturiana, Santa Cristina de L.lena. Coles mesmes, dispón de delles aplicaciones multimedia, nes que'l visitante pue ampliar la información recoyida nos paneles y observar reconstrucciones infográfiques de Santa Cristina de L.lena, Santa María del Naranco y San Miguel de Lliño. Tien igualmente un pequeñu salón, susceptible d'acoyer pequeños seminarios, alcuentros o cursinos rellacionaos cola materia. A lo último, actúa como centru d'orientación turística del conceyu de L.lena y d'Asturies, y de l'arquiteutura prerrománica asturiana en particular.