Luis Fumanal Otazo

Luis Fumanal Otazo (1924-1998), direutor artísticu de la fábrica de lloza de San Cloyo mientres el periodu del 1952 al 1989, consiguió poner a la industria uviedina a nivel européu na década de los 70, tanto pol diseñu formal de cacíes y otres pieces d'usu cotidianu, como pola variedá y riqueza de les téuniques decoratives emplegaes. La presente esposición, comisariada pol especialista Marcos Buelga, tien como oxetivu poner de relieve la importancia d'esta figura, pa la que se consiguieron axuntar toda una serie de pieces y dibuxos procedentes, na so mayor parte, del depósitu d'obres que la familia del artista dexó nel so día nel Muséu de Belles Artes d'Asturies. Al traviés d'elles pretende amosase la interesante contribución fecha por Fumanal dende'l so puestu de trabayu n'Asturies a la cerámica estatal del sieglu XX.

A la so llegada a Uviéu nel 1952, la fábrica atopábase nun momentu óptimu d'espansión, con una bona situación económica y unes instalaciones modernizaes nes que los fornos túnel Kerabedarf acababen de construyise. Yera poro un momentu afayadizu pa que'l nuevu decorador vascu plantegárase'l so asentamientu definitivu, asumiendo'l retu de dirixir una fábrica que competís cola Cartuja de Sevilla'l primer puestu na producción estatal de lloces. Fumanal va empezar el so llabor de direición siguiendo de cerca la desenvuelta pol so predecesor, Fernando Somoza Soriano (1927-2006), qu'amás d'asesoralu, siguiría trabayando mientres dalgún tiempu como grabador pa la fábrica dende la so casa en Madrid.

Va ser na década de los 70 cuando Fumanal empecipie'l xiru más significativu de tola so actividá profesional, modificando sustancialmente el tipu de productu ellaboráu en San Cloyo. El cambiu venía a coincidir con otra bona etapa de la fábrica uviedina, pero n'últimu términu yera la resultancia de la so madurez como ceramista, precisamente nun momentu que podríamos definir como de renacencia de la lloza estatal. Sólo asina esplícase que, tres una asimilación sorprendente de los nuevos enclinos de la cerámica industrial del momentu, que conocía de primer mano polos sos viaxes a Inglaterra, Francia y Alemaña, y al empar pol siguimientu del llabor de los sos colegues europeos al traviés de revistes especializaes como 'Pottery Gazette', 'Die Schaulade' y otres, la fábrica de San Cloyo algamara de sópitu un ésitu estatal ensin precedentes, acordies al impulsu modernizador sosteníu mientres les dos décades anteriores y sobre manera tres la puesta en marcha del plan d'ampliación del 1971.