'La comedia de Miles Gloriosus', de Teatro Kumen

'Miles Gloriosus' ye una obra de Plauto, escrita nel 205 a.C., que narra les aventures d'un militar que ta encegoláu por conquistar... ¡muyeres ayenes!

Pirgopolinices, escrupulosu coles sos obligaciones militares, alluga dientro de sí una personalidá tan 'donjuanesca' y enfermiza que se convierte nel centru de la burlla de toos cuantos lu arrodien, hábilmente empuestos, eso sí, pol esclavu Palestrión.

Les trampes que-y pon esti avispáu esclavu y la debilidá que carez el Miles pol sexu femenín son los filos conductores d'una comedia que'l so final concuerda col so desenvolvimientu: el Miles ta a puntu de perder la so... ¡'más querida' graduación!

Ensin ser la meyor obra plautina, ye, con muncho, la más célebre de toes elles. La tradición lliteraria, sicasí, tuvo un tratu desigual con 'Miles Gloriosus'. Interpretada n'ocasiones como una obra antimilitarista, unes vegaes goció de los aplausos más calorosos y n'otres quedó condergada al más puru de los ostracismo.

Pero 'Miles Gloriosus' nun ye nin antimilitar nin pacifista, ente otres razones porque nun lo dexara una sociedá, como la romana, entornada'l mesmu añu del so estrenu nos preparativos de la Batalla de Zama (202 a.C.) y ansiosa yá d'acabar con Aníbal, el peor de los sos enemigos.