II Premiu y Festival Nel Amaro: 'Disculpe caballeru', de Zig Zag Danza

Pasu al frente, cuartu a la derecha, marcha alredor y vuelta al puestu de guardia. La lluna enllena relluma nel patiu de la silenciosa venta y les armes que vela'l Caballeru rellumen cola lluz propia de les meyores histories de caballería. De secute una interferencia na paz nocherniega, un suañu en forma de noble Dama. Pero, ¿ye una ilusión o una realidá? ¿Son les ilusiones realidá o quiciabes ésta una simple ilusión?

'Disculpe caballeru' plantéganos esti dilema valiéndose de los personaxes que creara Cervantes nel so testu más universal, enseñándonos que realidá o ilusión tomen forma na nuestra cabeza y condicionen la visión nuestra del mundu que nos arrodia. Una vez más el director y coreógrafu Ramón Oller crea esta pieza pa la compañía onde afonda na figura del fidalgu más célebre de la historia, Don Quixote.

Cuarta y última obra finalista del II Premiu y Festival Nel Amaro de Teatru Profesional en Llingua Asturiana y Gallego-asturiano.