'Cantares de la mina y la mar', de Chus Pedro y Pipo Prendes

Nada ye más señaldoso que la música y les imáxenes por que surdan les alcordances d'una vida. Cómplices y emotivos, Chus Pedro y Pipo Prendes brinden al públicu la oportunidá singular de repasar parte de la nuesa historia vital encadenando alcordances nun mano a mano ente dos artistes que representen dos mundos aparentemente bien distintos: ún vertical, la mina, y otru horizontal, la mar. Dos mundos que, sicasí, comparten nueche y día, riesgu y sacrificiu, compañeru y sofitu, traxedia y infortuniu, agua y tierra, sudu y llárimes.

'Cantares de la mina y la mar' ye un espectáculu nel qu'estos dos artistes asturianos conxuguen los sos cantares, que yá son parte de la historia musical d'Asturies, con canciones que foron comunes nel tayu de los mineros, na xera de los marineros y nel chigre que toos frecuentaben.

Nel escenariu
Voz: Chus Pedro.
Voz y guitarra: Pipo Prendes.
Pianu y teclaos: Gabino Antuña.
Guitarres: Fernando Pérez Vega.
Batería: Julio Sánchez Andrade.
Baxu: Óscar Santos.