'Arte y mito. Los dioses del Prado'

El Muséu de Belles Artes d'Asturies acueye la esposición temporal 'Arte y Mito. Los dioses del Prado', resultáu de la collaboración ente'l Museo del Prado, qu'empresta hasta una cincuentena de les sos obres, y la Obra Social "la Caixa". L'amuesa, que tien calter itinerante, inclúi una pieza de Rubens y Quellinus II, 'Vulcano' (S. XVII) que davezu puede vese nel corredor de la planta noble del Palacio de Velarde gracies a un depósitu del Museo del Prado.

Nesta ocasión esplégase l'argumentu de la mitoloxía clásica al traviés d'una estraordinaria seleición de 31 pintures, 17 escultures y 2 medayes. Ente los autores representaos tán Ribera, Zurbarán, Coorado Giaquinto o Martínez del Mazo, con magníficos trabayos. Magar la esposición prosigue un sentíu cronolóxicu, arrexúntase al empar en filos temáticos asociaos a los testos griegos.