Conciertu gala d'añu nuevu cola Orquesta Mercadante

La Orquesta Sinfónica Mercadante promovióla'l so direutor titular, l'asturianu Mariano Rivas. Tolos músicos de la orquesta son miembros o formaron parte de les meyores agrupaciones orquestales, conservatorios superiores y teatros de la Comunidad de Madrid y quixeron sumase a esti proyeutu de calidá.

Saverio Mercadante foi un compositor italianu del sieglu XIX con un venceyu mui especial con Asturies gracies a dos de les sos óperes: escribió pal Teatru La Fenice de Venecia 'La solitaria delle Asturie' (1840), ópera que ta siendo trescrita pol propiu direutor usando fontes primaries veraces pa ser espublizada la so edición crítica, asina como la so estrena mundial absoluta moderna, y 'Pelagio' (1857), la que fora la so última ópera terminada, ofrecida al Teatru Xovellanos nel 2005, na so edición práutica en versión de conciertu, con Carlos Álvarez y Alejandro Roy como protagonistes cola Orquesta Sinfónica del Principáu d'Asturies (OSPA), dirixida pol propiu editor. Nesti conciertu tan especial de valses, polques, zarzuela, música española y dalguna sorpresa más van participar los solistes Lucja Madziar (violín), Quintín Bueno (tenor), Nastasja Djordjevic (sopranu) y Susana Algora Fernández (bailladora).